أسرارك والصندوق الاسود
( الموبايل )
وليد حسين
لو كان تليفونك شاهدا عليك في يوما ما
لنطق بمعاني كثيرة ومشاعر مبعثرة وضجيج العتاب والحب والكرة …..الخ
الموبيلات لو اتكلمت في يوم هتقول حكايات كتير ،
هتشهد علي دموع محدش شافها ،
ووجع وانكسار محدش حس بيه ،
وحب ومشاعر حلوة ماشافتش النور ،
وكره وحقد وغل مستخبي في الصدور ،
هتشهد علي ضحكه محدش سمعها ،
علي فرحة في عنيك وقلبك محدش لمحها ،
هتشهد علي كلام كتبته الف مره واتمسح ،
هتشهد علي الي بتكلمه ومهتم بيه ومنك سرح ،
واللي لما سالت عنه وبعتله طار من الفرح ،
هتشهد علي صور محدش يعرف انها موجودة ولا حتي صحابها ،
و هتشهد علي صور كانت واخدة اكبر مساحة وفجأة اختفت واختفي معاها صحابها ،
هتشهد علي ارشيف رسايل لذكريات وايام حلوة عدت وخلصت ،
وهتشهد علي مسح لكل حاااجة لناس وايام وجعوك بكل شكل وطريقة ،
هتشهد علي ناس بالايام والشهور مستنيه رسالة او كلمه
او اتصال ،
هتشهد علي ناس ماكانش بيكفي الكلام بينكم طول الليل والنهار … وفجأة مابقتوش تعرفو عن بعض حاجة ،
وناس عمرك ماكنت تتخيل ان يكون في بينكم حتي السلام.. وفجأة بقي كل سرك معاهم ،
هتشهد علي ناس غليت وعليت ،
وناس نزلت من نظرك ورخصت ،
وناس بعيده قربت و اطمنت ،
وناس قريبة اتجاهلت وبعدت ،
وناس كانو أغلي حاجة وفجأة بقو ولا حاجة ،
وناس كانو ولا حاجة بقو هما أهم حاجة ،
هتشهد علي اللي كان باقي وفضل جنبنا،
و اللي باع وفارقنا ،
و هتشهد ع اللي بينك وبين نفسك
ومايعرفش عنه حاجة غير ربك ،
هتشهد علي ذلاتك واخطائك وذنوبك ،
وهتشهد علي توبتك وندمك ودموعك ،
باختصار الموبايلات بقت الصندوق الاسود في حياة كل انسان فينا.. وبقت اقرب لينا من ناس كتير 💙
