سامحينى يا أمى 

كلمات  محمود جنــيدى

أمّا حبيت اقولّك :
كل سنة وانتى طيبة يا أمى ..
حسيت كأنى رجعت عمرى كله ..
كأنى يادوب لسّة باخطّى تاتا تاتا ..
وانتى بتزعّقى :
حاسب لتنخبط فى الحيطة ..
شريط طويل يا أمى ..
بطول سنين عمرى ..
كنت كل ماأكبر ..
أحس إنك أمّى أكتر ..
وأحس إنى لسة طفلك الصّغيّر ..
فاكر أما كنتى تصحى الفجر تلبسينا ..
عشان نروح المدرسة ..
ودعوتك لنا والطبطبة على الكتاف ..
وتقولى ربنا يحميكوا م اللى شافت واللى شاف ..
وابويا كان طيب قوى ..
وحنيّن قوى ..
فاكره لما كان يندهلك :
خدى ادّى كل عيّل م العيال مليم ..
بس ده مكانش شئ مستديم ..
يعنى مش كل يوم أو أسبوع ناخد المليم .!!.
وكنتى تقوليلنا ،
اصرفوا مليم واحد وحوشوا التانى ..
كنتى حنيّنة وطيبة ..
وكانت دمعتك قريّبة ..
شلالات بتنزل من عنيكى لو فينا ألم
علمتينى من غير ماتقصدى حاجات كتير ..
علمتينى إنى أعيش بين الناس بقلب كبير ..
يعنى عشان أتحمل الحياة والناس ..
يبقى لازم يكون قلبى كبير ..
وعشان أستوعب اللى بيجرى ..
يبقى لازم يكون عقلى كبير ..
بس النهارده وبجد يا أمى ..
افتكرت شكلى يوم وفاتك ..
يومها حسيت انى لسة طفل ..
حسيت قوى انى يتيم ..
يااااااااه ..
كداب يا أمى اللى يفتكر إنه كبر على أمه ..
كداب اللى يقول إنه استغنى عن حضن أمه ..
جاحد اللى ميناديش النهارده بعلو صوته على أمه ..
والله محتاجلك رغم سنين عمرى الطويلة ..
محتاجلك قوى بس ما باليد حيلة ..
شفتى يا أمى ؟؟
شفتى ازاى أنا سرحت فيكى ؟؟
شفتى ازاى بكيت وانا مفروض أهنيكى ؟؟
معرفش لو حد شافنى بابكى حيقول ايه ؟؟
طب هو عيب انى أبكى لما افتكرت أمى ؟؟
معلش سامحينى يا أمى ..
مقدرتش أعوّضك عن ليالى السهر ..
ولا عن التعب وانتى شايلة همى ..
سامحينى يا أمى ..
القلم بيرتعش فى إيدى من كتر الوجع ..
واجعنى قوى فراقك ياأمى ..
كان نفسى أقولك كل لحظة وانتى طيبة ..
بس انتى فين وانا هنا ..
لكن ..
يمكن تكون لحظة لقايا بيكى قريّبة ..
****************
31 مارس 2018