***(( حكاية صورة ))***   …. القصر العيني ….

***(( حكاية صورة ))***

  …. القصر العيني ….

وليد حسين عمر

 

يحكى أن الأمير شهاب الدين أحمد العينى قد قام ببناء قصر يتباهى به أمام أمراء المماليك وسمى قصر (العينى) وده كان سنة ١٤٦٦م في عهد السلطان خوشقدم الجركسى اللى عجبه القصر جدا و أشاد بيه .. واللى أصبح بعد كده أول مدرسة طب فى مصر والشرق الأوسط 

و بعد كدا خلال فترة حكم السلطان قايتباى حصلت مشاكل بينه و بين الأمير شهاب الدين العينى صاحب القصر و فرض عليه ضرائب كتير فإضطر إنه يسيب مصر عشان يموت فى المدينة المنورة ويدفن فى البقيع ..

القصر أهمل فترة كبيرة لحد دخول الحملة الفرنسية اللى حولته في البداية لمعسكر للجيش ثم مستشفى عسكرى ولما مات كليبر إتدفن فى حديقته المطلة على النيل و بعد كدا تم نقل جسمانه إلى فرنسا ..

خلال فترات كتير كان القصر عبارة عن مدرسة حربية ثم سجن للأمراء اللى على خلاف مع السلطنة فى مصر سواء في العصر المملوكى أو خلال تبعية مصر للعصر العثمانى ،، مش بس كدا ده فى بعض الولاة كانوا بيحولوه لمتنزه وده علشان موقعه المميز على النيل ..

و لما محمد على حكم مصر و إبتدا يهتم بالتعليم و بعد رجوع البعثات من فرنسا و أوروبا قرر ينشئ مدرسة طب وكان مكانها فى أبو زعبل لحد ما إبتدت حروب محمد على فى الشام فقرر ينقل المدرسة للقصر عشان يكون أول مدرسة طب في مصر و الشرق الأوسط و إتخرجت منه أول دفعة سنة ١٨٣٢م من هنا إتغير مسار القصر تماماً لحد ما في سنة ١٩٨٠م إتهدم مبنى القصر القديم وأعيد بنائه وبعد كدا أصبح تابع لجامعة القاهرة ..

رغم كل التغيرات اللى مرت على القصر ورغم هدمه وتغيير إستخدامه أكتر من مرة إلا إنه فضل محتفظ بإسمه ولقب صاحبه لحد النهارده قصر العينى .. 

رحم الله الأمير شهاب الدين أحمد العينى

وإحفظ مصر وشعبها وإجعلها كما تستحق أمة عظمى بين الأمم