محمد محب الدين
حوار بين اللحمة والفول المدمس
اللحــمة قالـت للفــول إتلـــم يا مدمـــس
شايفاك كده على طــول فرحـان ومتحمــس
على إيه عايش لى الدور يا أبو طينة ومسوس
الفــــــول قـــال لــها بســوس وليا الفخـر
أكــــل الغــــلابة أنــا شـاهـد عـليا الدهـر
مشـهــــور ويكفينـــى وسـط البشر سـمعة
بطحينــة تلاقينــــى أو حــتى بالدمعـــة
يعرفنـى جيل ورا جيل م الروضـة للجامعة
أمـــا إنتـى يا تعبـــانه للشــهرة محـــدودة
علـى خشــبة الجـــزار أهى سلعة معروضـة
غالية صحيـح التـمــن هايجور عليكى الزمن
مـا هاتبقـى موجـــودة .
اللحمــة قالـت هـهءء ده قصر ديل يا أزعر
إشهــد وقـــول الحــق علـى إيـه هاتتكبـر
دا أنا يابنى من صغـرى وانا أكلـة الباشـاوات
ولا يعمــل البـوفتيـك غير لحمى أنا بالذات
والفــتة مــن غــيرى تشـبع صوات وعياط
ولا حــد مــنى يمــل ولا حـد غيرى يحـل
قام حط رجل فوق رجل وبعلـو صـوت أم قال
شوفي يا حــتة عجـل سيبيكى م الفشخرة
وكفـاية هــرى كتيـر يا واخدة ع المنظرة
والكـــدب والتبــريـر دا إنتـى يا موكوســة
خلطوكى لحم حـمير ناسـيه جنون البقـر
من كام سـنة فاتـوا ؟! واللى إتـأذوا م البشـر
ضحكتله ضحكة خوف وقالـت لـه ما تفكـك
إعمل يا فـول معـروف دا أنا برضوا زى أختك
وكــلامى كــله هــزار صـدقـنى وبانغشــك
دخل الشيطان وسطنا والمشــكلة كبــــرت
أنــت الكبيـــر إنمـــا أنا عـــيلة وغلطـــت .
اللهم بارك لنا فى الفول واللحمة وإحفظهم لنا ياربنا من الزوال وإحفظ مصر وشعبها وإجعلها كما تستحق أمة عظمى بين الأمم
