مقالات وحكايات ماما زوزو فى رمضان
محمد الشطور
بقلم دكتورة زينب زكى
من أشطر الشاطرين حبايبى الحلوين اللى بيسمعوا كلام مامتهم وفى رمضان الكريم صايمين ومن ربنا قريبين وبيصلوا الصلاة فى وقتها وبيعملوا كل حاجة حلوة ماما زوزو بتحبها ..
يا ترى ماما زوزو بتتكلم عن مين ؟ تعالو نشوف ..
كان يا ما كان يا سعد يا اكرام ما يحلى الكلام الا بذكر النبى عليه الصلاة والسلام .. كان فيه ولد جميل واسمه محمد .. على اسم سيدنا النبى عليه الصلاة والسلام عارف واجبه ومش مستنى ماما تحاسبه .. شاطر وأمير بيصوم وبيصلى كتير..
وفى يوم من الأيام شعر فى الصيام انه عطشان وجعان .. ومن خوفه من ربنا كان دايما قلقان .. وخايف يفطر ربنا يحاسبه .. ويكون مقصر فى عبادته .. ورغم صعوبة الجو وشدة حرارته .. لكن تماسك وقرر يكمل صيامه وما يفطرش رغم تعبه .. وجوعه .. وعطشه .. وراح يحكى ل ماما زوزو انه شاطر وجميل .. ورغم تعبه الا انه مستمر وهيقدر يكمل ان شاء الله صيامه ..
لكن سألها .. إحنا ليه بنتحمل تعب الصيام ؟ وليه بنصوم أصلا ونتحرم من الأكل والشرب ؟
ماما زوزو قالتله .. لأن ربنا سبحانه وتعالى قال فى القرآن الكريم “شَهْرُ رَمَضَانَ الَّذِي أُنزِلَ فِيهِ الْقُرْآنُ هُدًى لِّلنَّاسِ وَبَيِّنَاتٍ مِّنَ الْهُدَىٰ وَالْفُرْقَانِ ۚ فَمَن شَهِدَ مِنكُمُ الشَّهْرَ فَلْيَصُمْهُ ۖ”
وسيدنا رسول الله صل الله عليه وسلم قال
روى البخاري (1761) ومسلم (1946) عن أَبي هُرَيْرَةَ رَضِيَ اللَّهُ عَنْهُ قال : قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : ( قَالَ اللَّهُ : كُلُّ عَمَلِ ابْنِ آدَمَ لَهُ إِلا الصِّيَامَ فَإِنَّهُ لِي وَأَنَا أَجْزِي بِهِ
يعنى شهر رمضان والصيام فيه تكليف من ربنا سبحانه وتعالى وفضله عظيم وثوابه كبير
وياريت كل الاولاد الحلوين يكونوا زى محمد شاطرين ومن ربنا قريبين ولشهر رمضان صايمين وربنا يتقبل منا الصيام والقيام قولوا آمين
وتوتة توتة خلصت الحدوتة
ماما زوزو
