نقلا عن صفحة عصفورة الوفد أم ياسين تقول مستشفي السنبلاوين علي راسي | جريدة اخر الاسبوع

نقلا عن صفحة عصفورة الوفد أم ياسين تقول مستشفي السنبلاوين علي راسي

متابعة عصام الجميل المدير التنفيذي لجريدة آخر الأسبوع
هكذا تحدث مسئول صفحة عصفورة الوفد الاديب طارق العوضي
إمبارح “العصفورة” كانت طايرة فوق مستشفى السنبلاوين بتلقط أخبار، الساعة كانت 10 صباحا، ولما جت عند باب الاستقبال، استرعى انتباهها اتنين ستات شايلين طفل وفى حالة رعب وهلع… دخلوا الاستقبال، دخلت “العصفورة” وراهم، وسمعت الأم بتقول لواحد من الدكاترة عرفنا اسمه “د. محمد دسوقي”:
ــ إلحقني الله يخليك، “ياسين” ابنى بيموت.
الدكتور هداها واخد الطفل منها، حكت له اللى حصل له:
ــ ابنى عمل حمام براز فيه دم، وديته لدكتور في عيادة خاصة، قال انه انسداد معوي، الدكتور طلب منى آجي المستشفى، علشان أعمل أشعة، انا وزميلتى جينا جرى.
نده “د. محمد” وتخصصه أطفال على زميل له اسمه “د. تامر سعيد” جراح، وفي ثوانى اتحول الاستقبال لخلية نحل تعمل لإنقاذ “ياسين” من الموت، علقوا محاليل، والولد كانت عنيه زى ما بيقولوا بالبلدى “مغربه”، وجريوا بالولد في الكريدور بتاع المستشفى على قسم الأشعة، وعامل اسمه عم “السيد” كان ماسك في ايده المحلول وبيجري وراهم علشان “ياسين”.
عملوا الاشعة قبل المنتظرين اللى كانوا بيدعوا لـ”ياسين” بالنجاه، ولما شاف د. محمد أشعة “ياسين” انزعج جدا وطلب استدعاء دكاترة تانيين وتمريض ، واتقلبت غرفة الاشعة لخلية نحل بوجود أخصائي الأشعة “حمادة نصر” وتم حقن سائل لمعالجة الانسداد المعوي ومتابعة تأثير الحقن باستخدام الأشعة.
ونجح فريق الضمير الطبي في انقاذ “ياسين” من خطر الموت.
حمد كل الموجودين الله تعالى، وبكت الأم وصديقتها من الفرحة غير مصدقين ما تم.
“العصفورة” تسكت؟! لأ..؟!
طلعت وراهم لحد سرير “ياسين”، هنت “أم ياسين” بنجاح العملية، وتحدثت الأم وقالت:
ــ مستشفى السنبلاوين على راسي، الناس دى عملت اللى ما كنتش اصدقه لو حد حكاه، وابنى ياسين وليد عبد اللطيف، قضيت يوم من 10 الصبح لبليل في مستشفى السنبلاوين، أنا واحدة من الناس ماكنش عندى أى ثقة يالمستشفى نهائي، لحد ما جيتها النهاردة وشفت اللى عملوه مع ابنى، ربنا يكرمهم يارب، انقذوا “ياسين” من الموت.
العصفورة سألت “أم ياسين”:
ــ دفعتي أي فلوس جوه المستشفى أو جبتى حقن أو دوا؟
اندفعت تقول:
ــ لو طلبوا روحى كنت اديتهم ، لكن والله ما دفعت مليم ولا اشتريت حاجه من بره، واللى عمرى ما هنساه انهم عملوا كل ده جوه غرفة الأشعة ؟!!
وأنهت “أم ياسين” حوارها مع “العصفورة” قائلة:
ــ يا كل أهالى السنبلاوين والله والله والله عندنا مستشفى ودكاترة وتمريض.

اترك رد
مصر الطقس من أخر الأسبوع