بقلم الشاعرحسين محمود الليثي
صباح الخير ياسفاحة
يا قاتلةالقلب من الفرقة
يانايمة وسايبة دباحة
بتدبح قلبي من الحرقة
طعنتي القلب سكينة
وعيني بدمعي دا غارقة
ياسايبة ذكرى كدابة
يا غلطة عمر
خدعتيني بلمسة إيد
وخدين حمر
وضحكة بريئة مرسومة
كأنها خمر
زماني عيشته وياكي
سنين مخدوع
أطمن نفسي بهواكي
وقدت شموع
أتاري النية جواكي
طريق موجوع
بتجازي قلبي بأفعالك
وتعيبي فيا بكلامك
خلاص مش هقدر أنسالك
دا خيط مقطوع
دا خيط لوهاوصل فيه
هايتعقد
والعيشة بكره تكسيها
بلون أسود
خلاص قررت أتغير
خلاص هابعد
هاتعيشي العمر مكسورة
نتيجة البعد
مش هتلقي مني غير صورة
وبوعد وعد
بقيتي قبلة مهجورة
خلاص وبجد
بجد خدت منك درس
مش هانساه
هافكر قبل ما اسقي الود
لناس فقداه
حساب الناس دامش بالعد
دا روح وحياة
ماهيا الدنيا مليانة
قلوب طاهرة
بتبقي قربي موجودة
ومش ظاهرة
بنجري علي البعيد ونقول
دا أغلى حبيب
بيسقينا البعاد قسوة
ويبقى نصيب
ونفضل طول الحياة ننادي
شوفولنا طبيب
خلاص قررت أشوف نفسي
واعيد حساباتي من الأول
هتلاقي الدنيا تحلالي
وهاتغير وهاتحول
