حبكيات … ( صورتَك في يوم ما تغيب ) … – جريدة اخر الاسبوع

حبكيات … ( صورتَك في يوم ما تغيب ) …

كتب: محمود الحبكى
متابعه: محمود كروز
فين الحروف والمعني فين والكلام ؟!
دا الشِعر لا يوفِّي ولا يكفِّي
ولا يطول المقام
باب السما مفتوح ونازل ضيّ
وإن الشهيد يُرزَق في جنَّه وحَيّ
وبدمُّه يفدى الأرض
لجل ما يعيش اللي جاى
والسيره تُذكَر
كلِّنا بنضرب سلام
إسم العريس في الجنَّه كان ( إسلام )
صورتَك في يوم ما تغيب
سيرتَك دا مِسك وطيب
وإنت اللي كُنت حبيب
والزَفه كانت بعد ( شهر صيام )
فاكِر يا إسلام ( مسجد التحرير )
فاكِر صلاة الفَجر والتبكير
فاكِر يا إسلام بعد ما تصلِّي
لحظة خروجَك تقصد التأخير
لا سبقت حَد كبير
ولا كُنت من قُدام
نِعمَ اللي ربَّي يا شيخنا تاج ع الراس
إسلام نشيد بيسطَّر الكرَّاس
حامي لحدودنا ورائد الحُرَّاس
ح يعيش مِثال يحتذى
لو طالِت الأيام
إسلام يا ضِحكه في قلبِنا ح تعيش
إسلام كأنك مأموريه في جيش
مستنظرينك إوعي يوم ما تجيش
لو صوت نَدَه صوتَك يقولها تمام
لِسَّه الكروت مطبوعه لزفافَك
والصوره حلوه وأحلي أوصافَك
تعلا النجوم والرُتبه في كِتافَك
وإنت العريس ح تزيِّن الهِندام
يا شهيد وعايش فينا يا إسلام
____________
محمود الحبكى

Please follow and like us:
Pin Share
مصر الطقس من أخر الأسبوع
RSS
Follow by Email