حكايات ماما زوزو
زهرة ندا
بقلم دكتورة زينب زكى
كان يا ما كان يا سعد يا اكرام ما يحلى الكلام الا بذكر النبى عليه الصلاة والسلام .. فى عصر قريب مش بعيد .. وقلب وفى أكيد .. كان فيه بنوتة جميلة اسمها ندا وكمان كان فيه صديقتها ماما زوزو
وفى حديقة البلد كان فيه زهور مالهاش عدد .. لها أشكال وألوان كتيرة .. قربت ماما زوزو شوية تختار زهرة جميلة ندية تقدمها لصديقتها الجميلة ندا هدية ..
وفجأة .. من غير تفكير الزهرة وقعت من ايدين ماما زوزو فى الميا .. وماما زوزو كانت زعلانة وعيونها طايرة ورا الزهرة الغرقانة .. وتقولها يا زهرة يا ندية .. أوعى تغرقى فى الميا .. أنا كنت هقدمك هدية .. لأجمل وأغلى صدديقة وفية .. أستنى يا زهرة ما تغرقيش .. إختارتك بيضاء وصافية .. لأجل عيون صديقتى الجميلة الدافية ..
وبسرعة ظهر الاستاذ الجميل الكريم أشرف .. ومد ايده فى الميا .. وخطف الزهرة الندية اللى هتقدمها ماما زوزو لصديقتها الجميلة ندا هدية .. وقالها وردتك الندية يا ماما زوزو .. أنقذتها من الميا علشان خاطر ندا الوفية ..
ماما زوزو فرحت جدا لإنقاذ الزهرة الندية .. وشكرت أستاذ أشرف انه قدر يحافظ على الهدية .. علشان خاطر الجميلة ندا الوفية.
وفعلا ماما زوزو أخدت الزهرة الندية .. وقدمتها لصديقتها الجميلة ندا هدية .. وفرحوا الاصدقاء كلهم وكانت ضحكتهم مدوية .. وقرروا يوجهوا رسالة لكل الناس ..
إن التعاون بين الاصدقاء بيسبب سعادة جماعية .. زى سعادة ندا الجميلة .. بهديتها الزهرة الندية .. زهرة ندا
وتوتة توتة خلصت الحدوتة
ماما زوزو
